I Borghi di Octavia
Vilaneuva Solar e ‘l mòbil baròch
Fin-a a quàich desen-a d’agn fa, ël sinquanta për sent dl’economìa dël pais ëd Vilaneuva Solar a j’era gropà al bòsch e a la lavorassion dël mòbil, dzora ‘d tut ënt në stil dit “baròch piemontèis”, rich ëd decorassion fàite a man e peui aplicà a la strutura.
Ancheuj a resto a Vilaneuva ancora quat mobilié artigianaj ch’a travajo ‘l bòsch fasend mòbij ën stil, seguitand parèj na tradission familiar e artigianal ëd longa data.
«Ancheuj a resto a Vilaneuva ancora quat mobilié artigianaj ch’a travajo ‘l bòsch fasend mòbij ën stil, seguitand parèj na tradission familiar e artigianal ëd longa data.»
Dëscheurbe Vilaneuva Solar
Is rendoma cont ch’a pudrìa smijé ën pòch dròlo, ma la prima còsa ch’iv consijoma ‘d fé quand ch’i rive a Vilaneuva Solar a l’é fermeve a amiré la canònica dla paròchia. Na canònica, direve voiàutri? Eh, sì. La canònica dël pais a l’é an efet un-a dle pì bele d’Italia, con la faciada ossidental rica ‘d decorassion ën cheuit a la fransèisa e un dij mej esempi dl’architetura ën cheuit dël prinsipi dël Singhsent, quand che lë stil gòtich piemontèis a ancaminava a risente dl’influss vivificant dël Rinassiment.
E già che i-i seve perdve nen la Cesa parochial, che për j’amant dl’art manerista a conserva ën dipint atribuì a Gioann Angel Dolce. Lì davsin as treuva ël Castel dij Solaro, na vera e pròpria fortëssa medioeval che ancora ancheuj a conserva l’aspet orgojos e imponent, e ch’av farà sente al sicur quand che passereve l’ex pont levatòjo dë dlà dal fossà. Na curiosità: ënt ël castel Silvio Pellico a l’ha lesù ij prim ësboss ëd Le mie prigioni. S’i seve a l’arserca d’ën pòst anciarmant, ël castel a l’é lòn ch’a fa al cas vòst!
Castel dij Solaro
Ca Canònica
Santuari dla Madòna dla Nos
Confraternita ‘d San Lorens
Cesa ‘d San Martin
Vilaneuva Solar si racconta
Ën sla faciada dla capela a brilia n’afresch rafigurant Sant’Antòni abà, compagnà da l’inseparàbil crinèt. L’intern a l’é motobin danegià, ma mersì ai travaj ëd restaur ëd quàich volontari ancheuj as peul veghse ën dipint dla fin dël Setsent ch’a figura la Madòna con ël Bambin compagnà dal sant titolar dl’edifissi e ij sò sìmboj. La vòlta dla capela e le muraje lateraj a son anzolivà da dipint ornamentaj. Ën sla muraja dzora la pòrta, a l’intern dla capela, mersì ai restaur a l’é spontà recentement n’afresch dël Sessent motobin deteriorà anté ch’as vegh la Madòna con ël Bambin butà an tron tra doi sant. Ël dipint dzora l’altar a l’é la ripetission ëd cost afresch.
La capela, ch’as treuva ën sla stra ch’a colega Vilaneuva a Rufia, a l’é ën grave stat ëd degradassion. Ël di ‘d San Ròch as tnisìa na procission, dita dle “Rogassion ëd San March”, e a mnisìa celebrà na mëssa. Ën sla pòrta d’intrada a resto segn d’ën dipint ch’a figura San Ròch con le piaghe e ‘l can. La tèila dzora l’altar, nopà, a figura la deposission ëd Crist e da na banda as treuva rapresentà San Ròch con ël can. Ën bass a la drita as vego bin ij dà con ij quai ij soldà roman a son giugasse la vesta ‘d Gesù. Dzora a la curnis a-i é la testa ‘d n’angel ch’a smija ‘d bon-a man.